Concertazo Fin de Curso: Mary Valugo&Mino + Susy's Little Band

Co aforo completo dun público que gozou moito do concerto, pechamos as actividades da biblio (por este curso!). Foi especialmente emocionante a gran participación da comunidade educativa: profesorado, alumnado, amigos colaboradores da vila e de fora... Un luxo contar con tanta boa xente! 

Comezamos cunha versión actual de Putting on the Ritz, popularizada por Fred Astaire ou Ella Fitzgerald a cargo dunha formación deseñada para a ocasión: Susy's Little Band, con Susana de 3ºA na voz, Jose Antonio Fidalgo ao clarinete, gran músico xa coñecido noso doutras actuacións (e pai de exalumno) e Irma, a profe de música, ao piano.

Introducido o asunto, continuamos co groso do concerto: unha magnífica selección de temas do proxecto acústico da profesora de música Mary Valugo (ao piano) co cantautor Mino ás voces, guitarra e harmónica. Ofrecéronnos temas propios e versións moi ben escollidas, como Like a Rolling Stone, de Bob Dylan. Este último tema, como peche do concerto, contou coa colaboración de varios profes: Castor, na guitarra, Lola, na voz e Iván, Ana, Yannick e Irma na percusión. Neste tema rítmico axudounos tamén o noso querido alumno Fabio. 

Despedimos o curso con moita enerxía!

Deixamos testemuño audiovisual que tentaremos ir ampliando.

Mañá na biblio, concerto... Mino & Mary Valugo

 Mañá imos pasar un bo rato na biblio escoitando música da boa!

A profe de música Mary Valugo, a dúo co cantautor Mino, ofrecerán o seu repertorio en formato acústico. Por cuestións de aforo, participará o alumnado de 2º e 3ºESO. Tentaremos en próximas publicacións ofrecer contido audiovisual para os que non podedes vir. 

Tamén haberá unha colaboración misteriosa: Susy's little band... mañá saberemos de que se trata!

Inesquecible concerto de Álvaro Sieira.

Aquí vos queda o testemuño audiovisual do concerto de onte. Unha fermosura de obras, sensacións, atmosferas e toda a sensibilidade do mundo que Álvaro nos trasladou dende as teclas do piano.

O acto comezou cunha breve presentación do programa a cargo do alumnado de oratoria de 3ºESO para comprender un pouco mellor o que iamos escoitar. Aquí vos deixamos as notas ao programa que eles presentaron, e que foi esta marabilla:

PROGRAMA

Johannes Brahms

Seis piezas para piano, Op. 118

Intermezzo en la menor

Intermezzo en la mayor

Balada en sol menor

Intermezzo en fa menor

Romanza en fa mayor

Intermezzo en mi bemol menor

Isaac Albéniz

Suite Iberia

El Corpus Christi en Sevilla

Almería

Enrique Granados

Goyescas

Quejas, o la maja y el ruiseñor

Millóns de grazas, Álvaro! Na Semana das Letras, atopamos en ti un "bo e xeneroso" que nos deixou abraiados co seu bo facer.

Hoxe!!!! Non o perdades: Concerto na Biblio. Álvaro Sieira ao piano

 

PROGRAMA

Johannes Brahms

Seis piezas para piano, Op. 118

Intermezzo en la menor
Intermezzo en la mayor
Balada en sol menor
Intermezzo en fa menor
Romanza en fa mayor
Intermezzo en mi bemol menor


Isaac Albéniz
Suite Iberia

El Corpus Christi en Sevilla
Almería

Isaac Albéniz
Chants d’Espagne, Op. 232
Córdoba


Enrique Granados
Goyescas

Quejas, o la maja y el ruiseñor


Deixámosvos tamén aquí as notas ao programa, que presentará o alumnado de oratoria de 3ºESO.

Vinde gozar da música!

Atención! Na Semana das Letras, volve a música á biblio: Álvaro Sieira, Piano

 Porque na nosa terra hai moito talento, aquí vos traemos unha mostra: un pianista novo que xa demostrou polo mundo adiante a súa valía, ofrecendo concertos por toda a península, San Marino, Bolonia ou Londres.

É un luxo ter a Álvaro Sieira (Boiro, 1993) na nosa biblio, facendo soar no piano a Brahms, Granados e Albéniz. Apuntade na axenda! Día 21 de maio ás 18.45. E tamén podedes botarlle un ollo a esta entrevista tan interesante.

O Fogar das Musas, de verdade, na Semana do Libro: música barroca na biblio

 O pasado sábado, o noso IES foi O Fogar das Musas de verdade.

Un día de portas abertas para sinalar a Semana do Libro no que propios e alleos gozamos da beleza do Claustro do Poleiro, da nosa acolledora biblioteca, da poesía, da música...

A xornada comezou, portas adentro, cos músicos preparando e afinando na biblioteca... nin máis nin menos que un clavicémbalo, un órgano eléctrico e un teclado subiron as escaleiras de pedra. A continuación subiron tamén violas da gamba, frautas de pico, voces, violín e contrabaixo...

Mentres, no busto de Celso Emilio Ferreiro que sinala a nosa entrada principal, comezaba a reunirse un bo número de visitantes dispostos a percorrer o Poleiro da man da visita guiada que ofreceron os alumnos e alumnas de oratoria. Comezamos, como non podía ser menos, recitando conxuntamente a Celso Emilio baixo a bóveda que dá acceso ás dependencias do IES. A visita tivo nervios, anécdotas, risas e descubrimentos, e rematou na biblioteca para dar paso á música.

A nosa sorpresa foi maiúscula cando as cadeiras todas da biblioteca non chegaban para acoller ao público do concerto. Solucionouse da mellor maneira, aínda que os asentos a maiores non fixeran xogo cos que había. Non importou. Axiña, presentado o concerto polo alumnado de oratoria (que falou sobre os instrumentos, a formación que iamos escoitar e a obra que interpretarían), saíron os músicos a escena. Aquí, as notas ao programa.

O Ensemble de Música Antiga do Conservatorio de Música de Ourense non defraudou. Fantásticos instrumentistas, algúns moi novos, grandes voces e unha obra tráxica e ben fermosa, Venus e Adonis de John Blow... Emocionámonos e gozamos das harmonías do barroco, nunha viaxe no tempo ata os momentos da construción do noso edificio. A coordinadora da biblio tivo a sorte de ser a narradora do argumento, para axudar á súa comprensión.

Foi marabilloso reunir a tantas persoas para gozar da arte e da convivencia, partillar o patrimonio e dinamizar o centro e a vila.

Co 300 aniversario do Poleiro cada vez máis preto, agardámosvos en próximas convocatorias: paga moito a pena.

Deixamos testemuño audiovisual!

Comezamos coas celebracións do Día do Libro: Música barroca na Biblio

Para que vaiades facendo oco na axenda, anunciámosvos que o día 25 de abril ás 12.00 teremos un plan marabilloso na biblio:

A Ensemble do Departamento de Música Antiga do Conservatorio de Música de Ourense virá a presentarnos a súa produción deste curso: Venus e Adonis, de John Blow. Non vos preocupedes: teremos narración do texto para que ninguén perda o argumento.

Poderedes escoitar en directo instrumentos pouco habituais aquí: clavicémbalo, consort de violas da gamba, consort de frautas de bico e, por suposto, o coro. 

O Ensemble de Música Antiga do CMUS Ourense é un grupo no que cativada, profesorado e outros invitados colaboran para obter unha sonoridade fermosísima, nunha interpretación que chama a atención pola mencionada variedade de instrumentos e de idades: de nove aniños en adiante!

Moi interesantes son tamén as notas ao texto que dende o propio Departamento de Música Antiga nos achegan: 

" Como xa sabemos, John Blow é o compositor da "masque" Venus & Adonis, unha obra que se estreou en Londres o 17 de abril de 1684, despois de ser presentada ao rei Charles II de Inglaterra.
En canto ao libretto, aínda que o mito de Venus e Adonis inspirou o -coñecido e co mesmo título-poema de Shakespeare, do mesmo xeito que o da Metamorfoses de Ovidio, o texto que Blow empregou inicialmente atribúese á escritora Aphra Behn. Non obstante, tamén se pensa que podería ter sido escrito por Anne Finch en colaboración coa poeta Anne Killigrew.
É entón, Venus & Adonis de John Blow, unha obra na cal as mulleres desempeñan un papel único e fundamental na elaboración do texto musicado."

Non deixedes de pasarvos por aquí: 50 minutos de boa música nun entorno inigualable como é a nosa biblioteca... E, si: durante a construción do noso Claustro do Poleiro, esta era a música que se interpretaba en toda Europa (o trending topic do momento!)

Aquí podedes ver recesións na prensa desta presentación.

E aquí un pequeno exemplo musical do que foi a estrea no Conservatorio de Ourense.

A maxia de Mª José Cid na nosa biblio

 O venres día 30 celebramos finalmente o concerto de piano de Mª José Cid, adiado por mor da alerta meteorolóxica do día 23. Un día moi acaído: o Día da Paz.

A maxia produciuse nas mans da concertista, e desfilaron pola biblio as notas de Bach, Rameau, Debussy ou Turina.

A temática do concerto era a Inspiración. A concertista, formidable comunicadora, falounos do contexto da creación artística, do paralelismo entre as artes (música, pintura, literatura...) e tamén nos interpelou acerca das cousas que nos inspiran. Ben importante para acadar motivación e loitar polas nosas metas!

É un auténtico privilexio poder gozar dunha actividade de tanta calidade: gran parte do alumnado non acudiría a ela porque de entrada non cae dentro dos seus gustos á hora de xestionar o tempo de ocio. Por iso consideramos importante ofrecela no contexto escolar, e invitámosvos a que saidades da vosa zona de confort que os medios de masas vos ofrecen e vos atrevades a vivir novas experiencias!

Concerto didáctico de piano "Sobre la inspiración en el arte". María José Cid.

 

Xa podemos contarvos que o venres 23 teremos na biblio unha visita moi especial. Como somos O Fogar das Musas, Euterpre, a musa da música é unha habitual aquí.

Desta vez a encargada de darlle vida ao noso piano será María José Cid, que xa é a segunda vez que nos visita. Achegamos currículum e programa: veredes que é un auténtico luxo tela con nós... Desta vez o afortunado público será o alumnado de 2ºESO.

MARIA JOSE CID

María José Cid, pianista e doutora pola Universidade de Vigo e Catedrática de piano no Conservatorio Superior de Música de Vigo. 

É artista polifacética e abordou diferentes ámbitos ao longo da súa carreira: a interpretación, a docencia e temas relacionados co desenvolvemento persoal.  Ademais imparte cursos sobre manexo do stress en diferentes Conservatorios europeos e na UNED. Ten unha dobre licenciatura en Piano e Música de Cámara en Galicia e estudos de jazz en Barcelona durante 2 anos.

Interésase por diferentes estilos musicais. Perfeccionou a súa calidade de interpretación pianística con Ludovica Mosca e Luiz de Moura Castro, traballando tamén con Alicia de Larrocha, Cecilio Tieles, Anna Jabstrebska, Branca Uribe, Alain Motard etc. Recibiu o Diploma de Interpretación de Piano de Guildhall School con High Honours. Tamén exerceu como pianista acompañante e deu concertos como solista en España, Suíza e Portugal. Entre os seus últimos proxectos deu varios concertos a 4 pianos e orquestra e tamén actuou co dúo de violín e piano Quintillán - Cid . Ademais impartiu cursos sobre stress management nas Universidades portuguesas do Minho e Aveiro, no Conservatorio F.Bonporti , en Trento e na University of Arts en Tirana e no Conservatorio de Gallarate e na University of Arts de Zagreb

Así foi o Concerto de Nadal!

 Gozamos dun ratiño ben agradable partillando melodías... Aquí vos deixamos o programa e testemuño gráfico... Bo Nadal!

Preme na imaxe e accede ao álbum completo!

Concerto de Nadal

 Se es instrumentista e queres partillar música con nós, estás a tempo de apuntarte!!!! Aberto a familias e visitantes!!!

O Concerto da Paz... Música, poesía e emoción!

 Ben fermoso quedou o Concerto da Paz organizado onte na biblio. O son do piano, con obras de Einaudi, Tchaikovsky, Debussy, Grass, etc., alternou coa lectura de poemas a cargo do alumnado de oratoria, pedindo a PAZ, o cese das inxustizas, da ignorancia e dos fundamentalismos. 

Como di o noso Celso Emilio, 

"...agardarei

polo albor do novo día."

Alá van unhas fotos, a reportaxe audiovisual tardará un pouco máis.

Pianistas: Samuel, Alejandro, Irma , Mary.

Recitadoras: Darleky, Zoe, Marisol, Álvaro e Saray.

HOXE, Concerto da Paz!

 Achegámosvos a escolma poética que recitaremos entre as interpretacións... Preme na imaxe para acceder ao documento!

Música e poesía: o noso recital da memoria, en vídeo!!!

 Aínda estamos aínda a tope recollendo material para amosarvos...

Neste caso, o vídeo do recital poético que incluímos no concerto de fin de curso. Todo un éxito, xa veredes que participación tan activa do alumnado! O Poema Nuclear do noso Celso Emilio nunca defrauda...

Por certo, aquí podedes ver as fotos do concerto.

Concerto da memoria de Biblio Poleiro

Os nosos pianistas, polo mundo adiante.

 Non queremos deixar de agradecer á EMBC o seu convite para que o noso alumnado pianista participara na súa audición de fin de curso, no Auditorio Ilduara. 

Como sabedes, a chegada do piano de cola á biblioteca desatou entre o alumnado unha afición a este instrumento que atendemos nas nosas horas de lecer e que nos leva dado moitas sorpresas, e moi bos momentos musicais. Que ben que os nosos novos pianistas vaian gañando experiencia e "collendo táboas", como se di no gremio!

O dito, millóns de grazas á EMBC, na persoa de Sara Fernández, a profe de piano da escola, por darlle esa fantástica oportunidade á nosa rapazada, e parabéns aos que se animaron a tocar nese escenario novo para eles: Daniel Fernández, Samuel Gálvez e Alejandro Quintas.

Concerto de Primavera: pianistas de luxo

 Onte gozamos dun fermosísimo concerto no que o noso alumnado (e unha profe solta) e o da EMBC deron o mellor de si.

Ata tivemos a oportunidade de escoitar, en estrea, a opera prima dun dos nosos alumnos. Deixamos programa do concerto e algunhas fotos. Aquí podes acceder ao álbum "Os Concertos da Biblio"