Cóntame un conto!!! O proxecto de apadriñamento lector do alumnado de oratoria

 Tras prepararnos concienzudamente, por fin puidemos partillar coa cativada do CEIP Curros Enríquez as nosas habilidades como contacontos.

O grupo de 3ºESO da materia de oratoria participou onte pola mañá nesta actividade organizada pola biblioteca para tender pontes entre a Bibliocurros e a Bibliopoleiro, e foi unha colaboración do mais satisfactorio. Fomos moi ben recibidos e, preparados cos nosos contos, repartímonos entre os grupiños de rapazada de 1º e 2º de primaria, que parece que tamén o pasaron moi ben. O puntiño de emoción foi a volta de algúns dos nosos adolescentes ao seu cole de primaria.

Tamén o noso Fabio contou o seu conto, axudado por unha fermosa presentación audiovisual que realizou xunto coa súa profe Lola e co seu compañeiro Brais prestándolle a voz. Aquí deixamos unhas imaxes para que vexades o ben que o pasamos. Pregunta o noso alumnado... cando volvemos?

E non vos perdades o vídeo do conto de Fabio!!!

Unha visita á biblioteca... da man do alumnado de Oratoria de 3ºESO

 Como sabedes, o alumnado de oratoria está realizando a actividade "Guía por un Día", coa que estamos pasando moi bos momentos.

Quedou pendente na última entrada desta bitácora achegarvos este xenial material didáctico: con esta fermosa presentación, Fabio presentou a biblioteca, e os seus compañeiros e compañeiras prestáronlle a súa voz en cada locución gravada. Bravo, Fabio! Infinitas grazas, grupo!

Premede na imaxe para enlazar co material interactivo. É unha marabilla, que aproveite!

Neste vídeo, así en crú, en vivo e en directo, veredes o ben que se axeitou Fabio pilotando a presentación.

Como buscar na biblioteca: guía para o alumnado.

 Agora que a situación sanitaria permitiu cambiar o protocolo e que sexan os usuarios e usuarias os que manipulen os libros, cómpre repasar o proceso para a atopar o tesouro que precisemos. Aquí vos deixamos unha sinxela guía. Picade na imaxe para acceder ao documento. 

Comezamos coa apertura extraescolar da biblioteca!

 Estamos encantados de anunciarvos que retomamos a apertura extraescolar da biblioteca os martes, mércores e xoves de 15.30 a 17.10, e retomamos tamén a lectura en sala e as visitas. Agardámosvos!

Lectura fácil: o noso novo catálogo.

Xa vedes que aquí non vale parar!

Para que coñezades de primera man as nosas novas adquisición, partillamos hoxe o noso novo catálogo de lectura fácil: referencias nas que a linguaxe pero tamén a ilustración ou a maquetaxe están adaptadas para que sexan máis sinxelas de comprender. Botádelle unha ollada e vinde, que xa están en préstamo!