Xogando co Órgano de Celanova

 Pois outra das actividades que temos preparadas para a Feira Educativa Expourense é este cartaz con tarxetas adhesivas no que poderás coñecer ao rei dos instrumentos (o órgano de tubos) da man do noso formidable instrumento que está situado no lado do evanxeo do templo do Mosteiro de San Salvador. 

Sendo o foco de moitos dos nosos traballos, aquí tendes a información e as actividades realizadas sobre el.

Ao remate da feira, poderedes manipular a montaxe e aprender máis sobre este instrumento senlleiro.

A escultura conmemorativa da Poza das Ras, xa con nós

 

O 30 de agosto deste ano o Comité de Memoria Histórica da Comarca de Celanova formalizou un acordo co Concello de Verea e coas familias das vítimas para instalar na Poza das Ras unha escultura memorial.

Esta escultura lembra que Julio González, Amadeo López, Silvio Torres e Eloy Romero foron sacados do cárcere de Celanova e paseados na Poza das Ras o 29 de agosto de 1936: eran dous mestres, un chófer e un farmacéutico.

Finánciase mediante micromecenazgos, que reciben unha miniatura da gran peza de ferro instalada na Poza das Ras (Verea), deseño do escultor Xoán Torres Cidre. Xa temos unha delas nos nosos andeis: será a nosa nova Peza do Mes.

 

 

 

 

Finalizamos o trimestre co boletín informativo

 Felices vacacións!

Boletín marzo 26 de Biblio Poleiro

Exitazo na Feira Educativa Expourense Inspira

 Uns días de tolos pero moi proveitosos e divertidos. Así de bonita quedou a nosa caseta da feira e así de ben o pasamos: explicamos, recitamos, cantamos, amizamos, tocamos o piano, saudamos ás autoridades e inspirámonos moitísimo. Tamén, coidamos, servimos de inspiración: somos o Fogar das Musas. Para quen lle interesou, explicamos algunhas das nosas liñas de traballo: musealización, patrimonio, música, poesía, memoria histórica e tamén publicitamos o noso ciclo de FP Dual.

Pola nosa casa pasaron pianistas, cantantes e recitadores espontáneos, curiosos, pescudadores de información e mesmo influencers (en realidade, un formidable experto en comunicación, grazas, Roberto Pérez Marijuán, @robervigo). E tamén persoas que moi amable e voluntariamente se brindaron a deixarnos as súas inspiracións escritas nun post it... Mellor vos deixamos as imaxes, que o din todo.

Por certo, grazas ao alumnado de Dual e oratoria que nos axudou e acompañou nesta nova experiencia.

😄😄

400 Cervantes & Shakespeare

😄😄

O noso díptico da memoria

 Non paramos! Por fin, otro traballo en curso rematado para podelo mostrar na Feira Educativa e, por suposto, que pase a engrosar a lista de materiais informativos autoproducidos...

O Equipo da biblio e o Departamento de Historia levabamos tempo argallando un material sinxelo e resumido que informase sobre o relativo a Memoria Histórica en Celanova e tamén no noso propio centro, e que nos axudase a dar a coñecer o noso Centro de Interpretación Virtual da Memoria Histórica. 

Finalmente, aquí o temos! Un resumo que invita a afondar neste camiño de verdade, xustiza e reparación. Premede na imaxe para acceder ao documento completo, en formato imprimible.

En formato cartaz...

Día da Poesía: preparamos materiais para a nosa caseta da feira educativa.

 Non somos terra de poetas? Pois que mellor que engadir na nosa caseta da Feira Educativa Expourense unha actividade poética! 

E que será? Pois unha selección de poemas que invitaremos a recitar a propios e alleos, con acompañamento de piano, por suposto, que xa é marca da casa.

Velaquí a nosa selección, non están todos os que son, pero son todos os que están! (sen esquecernos de Lorca, un gran admirador da nosa fala e da nosa poesía, ao que recordamos no 90 aniversario da súa morte). 

Xa vos contaremos que tal nos foi co recital...

Celanova de memoria

 Recuperamos outra idea que estaba en proceso e que os amigos da librería nos animaron a continuar. Coa intención de mostralo na Feira Educativa á que estamos convidadas para os días 25 e 26 deste mes, presentámosvos o noso xogo de cartas de memoria no que afondaremos outro pouquiño no coñecemento do noso patrimonio. Co clásico sistema de xogo de ir volteando cartas e atopando parellas pasaremos un ratiño agradable, pero... Coidado!!! Algunhas parellas poden penalizar o resultado final!

Xa podes vir á biblio e botar unha partida!

Deixámolas aquí por se as queredes descargar e imprimir.