Somos de Premio!!! FEAE Galicia premia o Centro de Interpretación Virtual da Memoria Histórica de Celanova

 A celebralo!!!! Os noso traballos de Memoria Histórica pilotados polo Departamento de Historia e asistidos polo Equipo de Biblioteca (coa formidable colaboración do Comité de Memoria Histórica de Celanova) foron premiados polo Fórum Europeo de Persoas Administradoras de Educación, cuxa división galega convoca o Premio Rafael Rodríguez Martín, este ano na súa V edición. 

Estes premios "... buscan identificar, recoñecer e promover a grupos de docentes comprometidos e comprometidas coa innovación educativa, a través do desenvolvemento de iniciativas didácticas que axuden a construír unha rede de propostas educativas que inspiren transformación e innovación e que sexan facilmente transferibles a outras contornas educativas."

Como reflicten na súa web "FEAE é unha asociación non gubernamental que traballa no ámbito da educación de varios países de Europa, fundamentalmente en aspectos relacionados coa administración e a xestión educativas. Un lugar de encontro, de reflexión e intercambio que ten como obxectivo principal a mellora da calidade da educación."

Así que aí fomos nós co noso Centro Virtual de Interpretación da Memoria Histórica de Celanova, que reúne intervencións neste eido nas que participaron moitos departamentos, moitos agrupamentos e que dalgunha maneira permeou fóra do centro. 

Este proxecto está, como sabedes, dentro da enorme campaña O Fogar das Musas, que busca documentar espazos e pertenzas para musealizar e dinamizar o noso edificio senlleiro que en 2027 cumplirá 300 anos. Aquí podes visitar o noso Museo Virtual, e aquí todas as entradas desta bitácora sobre a campaña.

 Moitísimas grazas a FEAE Galicia por valorar o noso proxecto, e por auspiciar estas iniciativas que potencian e animan á innovación educativa: dannos azos para continuar desenvolvendo o noso labor con renovadas enerxías!

Así o conta FEAE Galicia na súa web , tamén podedes premer na imaxe para acceder ao contido.

O Premio Mouchiño na prensa

 Onte aparecía na prensa a nova do Premio Mouchiño que recollemos o domingo. Premede na imaxe para ver o artigo completo. Aínda nos dura o subidón!

Onte tamén, saltou a noticia: O premiado no Premio Mouchiño do Deporte Moncho Fernández, ao que tivemos o pracer de coñecer o domingo, será o entrenador do Girona de Marc Gasol. Parabéns, Moncho, e moitísima sorte! O teu bo facer de seguro se vai facer notar!

PREMIO MOUCHIÑO!!!!!

 Onte foi un día moi especial. Xa volo podemos contar: A Asociación BxL, Basket por Libros de Celanova recoñeceu a laboura da nosa biblio e da biblio do cole de primaria da vila, o Curros, co premio Mouchiño da Cultura.

Así que asistimos á gala de entrega de premios, no Auditorio Ilduara da nosa vila, moi ben preparada con todo o agarimo e bo facer, e atopámonos con veciñanza, cativada, autoridades e demais: é ben fermoso reunirnos arredor da cultura, do deporte, da poesía, da música...

O premio ao deporte foille concedido ao gran Moncho Fernández, que foi entrenador do Obradoiro, todo un referente no mundo do baloncesto.

Deixámosvos unhas imaxes e un vídeo. Teremos sempre o recordo deste día e o noso agradecemento: si que se pode ser profeta na propia terra. Grazas por todo!

En Santiago, de premio!!! Recollendo a mención do Innovagal

 É unha mención de honra, pero sábenos a gloria! Traballo de toda a comunidade educativa no que a biblioteca estivo (e está) especialmente implicada! Continuamos!!!

Preme aquí para ver o proxecto premiado!

Somos de premio!!!! Outra vez!

 Andamos tan atarefadas que nin tempo tivemos para contarvos a boa nova de que recibimos a Mención de Honra do Premio Innovagal, que recoñece a centros cunha relevante labor didáctica, de investigación e innovación para poder difundir as súas prácticas. 

O noso proxecto interdisciplinar "Arredor do Mosteiro" combina variadas actividades sobre patrimonio, literarias, científicas ou temas transversais. Estamos encantadas de que se recoñeza o traballo que se realiza no IES Celanova Celso Emilio Ferreiro e que de cando en vez aparezamos no mapa das boas prácticas.

Picade na imaxe para ver o proxecto presentado a concurso!

E o vídeo de candidatura!!!

A prensa fala de nós... Música no Mosteiro!

 Con tanta actividade non nos da tempo de celebrar tanta boa noticia. Xa sabedes que nos encanta que falen de nós... ben! De novo Laura Fernández recolleu nun dos seus artigos o premio que recoñeceu ao noso proxecto Música no Mosteiro.

Aquí vos queda o artigo dixitalizado.

Por certo, se queredes ver o padlet con todas as actividades do proxecto, picade aquí.

E se queredes ver todas as entradas desta bitácora referidas a MnM, aquí.

E aquí tamén podedes acceder ao blog da Asesoría de Bibliotecas Escolares para ver todos os proxectos premiados, xunto coas súas memorias, incluída a nosa.

Música no Mosteiro, de premio!!!!

 Outra vez estamos encantadas de contarvos que un dos nosos proxectos que con tanto agarimo e esmero sacamos adiante volveu obter un recoñecemento externo: o premio de Traballo por Proxectos 2022 na nosa categoría, convocado pola Consellería de Educación. 

Música no Mosteiro foi o proxecto que traballamos durante o curso pasado e que continúa neste grazas a algún fantástico cabo solto que quedou no tinteiro. 

Claro está que non podemos ser alleos ao formidable patrimonio que nos envolve: é natural integralo  nas nosas propostas de traballo, poñelo en valor e que toda a comunidade educativa o coñeza e poida fachendear del. Neste caso, como sabedes, afondamos nos os tesouros musicais do mosteiro: coros, órganos, cantorais, dende a perspectiva musical e a plástica... e xa foi un premio darnos de conta en xuño da enorme produción e das fantásticas experiencias que vivimos neste proceso.

Deixamos aquí o taboleiro no que acumulamos todo ese traballo e aquí todas as entradas deste blog sobre Música no Mosteiro. Agardamos que vos guste! Feliz día de Santa Cecilia, patroa dos músicos!

A nosa biblio, na tele!!!

Os medios volven facer eco do Premio Nacional de Boas Prácticas co que fomos recoñecidos. 

Aquí vos deixamos a noticia no Telexornal de onte, día 20 de decembro. Quedoulles unha montaxe ben bonita!!!

Micro vídeo-resumo do noso proxecto gañador do Premio Nacional de Boas Prácticas.

 A Aula Verde do IES, da man de Carlos Alonso, elaborou este vídeo breve para difundir o noso traballo gañador.

Agardamos que vos guste o vídeo, e xa sabedes que tendes toda, toda a info aquí mesmo no blog. O proxecto , a campaña e algunhas das nosas artistadas.

A prensa fala do noso premio de boas prácticas!

 Mirade que artigo tan chulo apareceu na prensa o sábado! Encántanos que falen ben do noso traballo e do noso centro!

Podedes picar na imaxe para acceder á versión dixital.

Premio Nacional de Buenas Prácticas 2021

Estamos de celebración porque (outra vez) SOMOS DE PREMIO!!!!!!!

Revalidamos o obtido fai 10 anos (pica aquí para ver o proxecto premiado en 2011): o Ministerio de Educación recoñeceu de novo o traballo da biblioteca do IES Celanova Celso Emilio Ferreiro a nivel nacional, demostrando que non perdemos as mañas.

O que máis nos gusta é que o nome da nosa vila e do noso centro (RURAL E PÚBLICO da Galicia profunda) resoe por todo o país como exemplo de boa praxis, e que se poña en valor o traballo do claustro, do equipo directivo, do equipo da biblio, do alumnado e da comunidade educativa en xeral, así como da Asesoría de Bibliotecas Escolares.

Pica na imaxe e bótalle unha ollada á memoria do proxecto premiado: Un mundo feliz?.

 

Tres ourensáns premiados pola súa excelencia académica (un deles de Celanova)

 Pois como ben di o titular, tres ourensáns foron recoñecidos cos Premios Extraordinarios de Bacharelato do curso 20-21. Recibirán 1000 euros e un diploma acreditativo, e a súa xesta constará no seu expediente. Estamos encantadas de que un deles sexa Santiago González, máis coñecido por Santi, e dende aquí mandámoslle os nosos parabéns polo merecido galardón. Orgullo de alumnado! 

Pica na imaxe para ver a noticia completa e a entrevista a Santi.

Algo estaremos a facer ben...

 Estamos encantadas de redactar esta entradiña estival para felicitar ao noso alumnado en particular e a toda a comunidade educativa en xeral polos fantásticos resultados na ABAU, que nos levaron ata o segundo posto do podio dos centros ourensáns. A materia prima, alumnos e alumnas de Celanova e contorna, é de primeirísima calidade, por iso intentamos non desmerecer como centro. 

Por outra banda, temos outra excelente noticia: un dos nosos alumnos, Santiago González Gómez, foi un dos 20 Premios Extraordinarios de Bacharelato 2021. Parabéns!!!

 Picade na imaxe e botádelle unha ollada ao artigo completo.

Vídeo de presentación das candidaturas ao Premio Galego de Educación para o Desenvolvemento e a Cidadanía Global

 Como vos contamos fai uns días, asistimos á reunión virtual dos finalistas e premiados neste fantástico certame no que tivemos o gusto de participar, o Premio Galego de Educación para o Desenvolvemento e a Cidadanía Global, e hoxe, a Coordinadora Galega de ONGD envionuos o xenial vídeo que elaborou presentando as candidaturas. Non podemos deixar de compartilo porque é fermoso vernos aí como finalistas coa nosa campaña Cómprame a Igualdade e porque é fermoso ver a cantidade e calidade de proxectos que os centros educativos aportaron. 

Non hai pandemia que poida con nós!

Nós participamos na Categoría B:

Partillamos tamén o vídeo da Categoría A:

Participamos na reunión virtual de recoñecidos do certame da Coordinadora Galega de ONGD

Onte pola tarde tivemos o inmenso placer de participar nunha reunión virtual á que fomos convocados os representantes dos centros gañadores e, no noso caso, finalistas, da primeira edición do Premio Galego de Educación para o Desenvolvemento e a Cidadanía Global que convocou a Coordinadora Galega de ONGD.

Xa en xaneiro partillamos nesta bitácora a nosa ledicia polo recoñecemento, e hoxe tivemos a oportunidade de gozar deste encontro.

Foi moi interesante coñecer os outros proxectos: a organización elaborou uns fermosísimos vídeos-resumo de cada unha das iniciativas que nos deixaron abraiadas. Imaxinamos que o noso, Cómprame a Igualdade, tamén abraiaría, a lo menos un pouquiño. O importante é ver cantos centros, docentes, alumnado e comunidades educativas en xeral están implicados nunha mellora da educación e da sociedade. É fantástico.

Tivemos tempo tamén para charlar un pouquiño entre nós, e finalmente, escoitar a experiencia doutra invitada virtual, tamén mestra: a boliviana Lita Gonzales, integrante do grupo Cholitas Escaladoras, un grupo de mulleres aimaras alpinistas que coa súa actividade deportiva fan unha laboura fantástica de empoderamento da muller e promoción da súa cultura, e xa son un referente mundial. Podedes ver aquí un dos seus vídeos, pero as redes están repletas de vídeos e artigos que falan moito e ben delas.

O feito é que quedamos encantadas do encontro: noraboa a todos, grazas pola convocatoria e que continúe celebrándose por moito tempo. 

Finalistas do I Premio Galego de Educación para o Desenvolvemento e a Cidadanía Global

Estamos encantadas de informarvos de que o noso proxecto Publigualdade/Cómprame a Igualdade volveu a ter recoñecemento externo, desta vez da man da Coordinadora Galega de ONG, que por primeira vez convocaba o Premio Galego de Educación para o Desenvolvemento e a Cidadanía Global.

Xa sabedes que Publigualdade/Cómprame a Igualdade foron campañas de concienciación subsidiarias da campaña de lectura da biblio Voces de Muller, e foron recoñecidas fai uns meses co primeiro premio Galicons-net dos Plans Proxecta da Xunta de Galicia e o Instituto Galego de Consumo.

Desta volta acadamos a fase final do concurso, o que para nós é un grande triunfo dado que este premio supón unha fantástica iniciativa que pretende "recoñecer experiencias educativas transformadoras que fomenten unha cidadanía solidaria, crítica e comprometida coa construción dun mundo xusto". Esa é precisamente a nosa idea da educación.

Parabéns aos gañadores, pendentes de confirmación definitiva, e á organización do certame por tan boa iniciativa. Que continúe moitos anos máis!

EDITADO!

Así o recolle a prensa:

Entrega (virtual) do Sello de Cooperación Bibliotecaria

Para dar a coñecer os traballos e proxectos das bibliotecas distinguidas co Sello CCB, o Consello de Cooperación Bibliotecaria, dependente do Ministerio de Educación, está a montar e difundir uns vídeos que substituirán á entrega de premios que se realizaría fisicamente en condicións normais. Aquí deixamos un deses vídeos, montados a partir das xeniais gravacións que o noso responsable da Aula de Audiovisuais Carlos Alonso se encargou de realizar.

E, DE NOVO... SOMOS DE PREMIO!!!! PUBLIGUALDADE, PRIMEIRO PREMIO GALICONS-NET DOS PLANS PROXECTA!

 Nos tempos que corren, estamos encantados de anunciarvos esta boa nova, que nos enche de satisfacción. O brazo activista da campaña da biblio "Voces de Muller", "Cómprame a Igualdade", co seu último proxecto "Publigualdade", vén de recibir o primeiro premio da modalidade Galicons-net dos Plans Proxecta, dependente do Instituto Galego do Consumo e da Competencia.

Como sabedes, todo o realizado neste ámbito atópase no blog comprameaigualdade.blogspot.com , por exemplo, o produto estrela da campaña 19-20: un vídeo colaborativo en tres entregas realizado no confinamento no que se sintetiza o aprendido sobre publicidade ética libre de estereotipos.

A prensa recolle información sobre o proxecto, e nós celebramos que unha vez máis o IES Celanova Celso Emilio Ferreiro aparece nos periódicos polas súas boas prácticas. 

Parabéns ao alumnado e ao profesorado participante!

Pica na imaxe e accede á reportaxe completa!

Mapa interactivo para gañadores e finalistas do Selo CCB

 Como sabedes, na convocatoria 2019 fomos recoñecidos como gañadores do Sello de Cooperación Bibliotecaria, a nivel estatal.

Para dar a coñecer os proxectos finalistas e gañadores, o Consejo de Cooperación Bibliotecaria, dependente do Ministerio de Cultura, lanzou este mapa interactivo para coñecer de primera man os proxectos e aportacións de cada entidade premiada.

E aí estamos nós!!! É ben interesante. Pica na imaxe e visita o mapa interactivo!!!

Aínda non marchamos. Artigo na Revista EDUGA

Aquí estamos, todavía achegando cousiñas das que fomos facendo nestes meses insólitos.

Mediática, como sempre, a nosa biblio aparece esta vez en EDUGA, a revista galega do ensino, neste artigo no que se explica polo miúdo a nosa campaña en curso, Voces de Muller.

Pica na imaxe para ver o texto completo!