Comezamos a semana fachendeando!
A nosa campá, exposta xa no corredor, aínda que non na súa situación definitiva, xa ten a súa exposición con este material da nosa factoría no que investigamos sobre campás, campanarios e usos de este instrumento idiófono tan antigo.
Aquí podes atopar a nova en prensa do achado da campá.
E este ano para nós é especialmente importante, xa que, como sabedes, a nosa campaña/proxecto de musealización tennos moi ilusionadas e entretidas.
O Fogar das MusasO Fogar das Musas continuará durante o curso que vén, pois é unha andaina longa e sen dúbida para facer sen presa. Dende que comezamos, enfocamos as nosas expectativas, aprendemos sobre o que implican os traballos de inventario, documentación, conservación e museografía e puxemos en valor pertenzas que xa están expostas nos nosos andeis.
Pescudamos información sobre espazos visitables da contorna (e de máis lonxe), activamos ao alumnado para que poña en valor o seu patrimonio, ofrecémonos como espazo visitable para que as institucións da vila o incorporen aos seus activos turísticos.
Feliz día dos Museos! Seguimos en marcha!
Aí ven o Maio de flores cuberto!
Comezamos o mes con este percorrido tan interesante pola historia deste noso espazo: a biblioteca.
Xa que continuamos co noso proxecto de musealización, O Fogar das Musas, pescudamos toda a información que puidemos, fixémonos con todas as fotos que se puxeron ao noso alcance e así de bonito quedou o noso "paseo", que completa á perfección a visita virtual da que xa dispoñiamos.
Se algúen ten máis información, estaremos encantadas de engadila!
Preme na imaxe para acceder ao documento completo!
Tamén en vídeo!
Queres saber máis sobre Darwin e as súas expedicións científicas? Sobre as súas viaxes? Sobre os seus descobrementos botánicos? Sobre os seus libros? Aquí están as respostas!
O proxecto "Árbores de dous continentes" continúa fabricando materiais así de interesantes!
Preme na imaxe para acceder ao documento.
Por fin viu a luz, froito das choivas e de pasar tempo na casa durante as vacacións, o Manual Básico para Museógrafas Novatas: un destilado elaborado por Isidora Gil adaptando e resumindo a sabedoría do equipo do Museo Etnográfico de Ribadavia, co que fixemos estas interesantes sesións de docencia.
Nunca estaremos agradecidas dabondo ao persoal do Museo, que tamén recolleu a colaboración na súa web.que tamén recolleu a colaboración na súa web.
Con este material xa estamos comezando o noso inventario, con todo o rigor posible e moitísima ilusión. Picade na imaxe para ver o documento, que tamén está xa no seu taboleiro Padlet correspondente, O Fogar das Musas. , en permanente actualización!
Seguiremos informando!
Que bonita coincidencia: árbores e poesía nun mesmo día! Aproveitamos a efeméride, o Día da Poesía e da Árbore, para presentarvos este proxecto, Árbores de dous continentes: un proxecto artístico, botánico, multicultural e tamén poético, claro.
O alumnado de 4ª ESO, procedente de dous continentes a ambos lados do charco, traballou en debuxo sobre especies botánicas dos seus respectivos países, documentándose e realizando unhas fermosísimas ilustracións artísticas pero tamén científicas.
Como guinda, unha escolma de poesías alusivas, que está en proceso. Deixámosvos un par de exemplos e o padlet completo do proxecto. Feliz día!
PENÉLOPE
Un paso adiante i outro atrás, Galiza,
i a tea dos teus sonos non se move.
A espranza nos teus ollos se esperguiza.
Aran os bois e chove.
Un bruar de navíos moi lonxanos
che estrolla o sono mól coma unha uva.
Pro ti envólveste en sabas de mil anos,
i en sonos volves a escoitar a chuva.
Traguerán os camiños algún día
a xente que levaron. Deus é o mesmo.
Suco vai, suco vén, Xesús María!,
e toda a cousa ha de pagar seu desmo.
Desorballando os prados coma sono,
o Tempo vai de Parga a Pastoriza.
Vaise enterrando, suco a suco, o Outono.
Un paso adiante i outro atrás, Galiza!
Díaz Castro, Nimbos (1961)
Comentario: esta sería a Penélope da que partimos, unha Penélope que vai adiante e atrás. Situámola na Terra Chá.
OUTRA PENÉLOPE
DECLARA o oráculo:
«QUE á banda do solpor é mar de mortos,
incerta, última luz, non terás medo.
QUE ramos de loureiro erguen rapazas.
QUE cor malva se decide o acio.
QUE acades disas patrias a vindima.
QUE amaine o vento, beberás o viño.
QUE sereas sen voz a vela embaten.
QUE un sumario de xerfa polos cons.”
Así falou Penélope:
“Existe a maxia e pode ser de todos.
¿A que tanto novelo e tanta historia?
EU TAMÉN NAVEGAR.»
Xohana Torres, Tempo de ría (1992)
Comentario: décadas despois temos unha Penélope que desexa navegar, actuar.
Como sabedes, estamos preparando a vindeira campaña, O Fogar das Musas... Deixámosvos a nosa información turística en novo formato, e... en tres idiomas!!!! (Polo momento!) E outras curiosidades interesantes que atoparedes neste taboleiro:
Premede nas imaxes para acceder.Galego
Castelán
Inglés
E tamén o tríptico para descargar e imprimir...
Na víspera do gran día, presentámosvos este taboleiro de recursos propios e alleos para que todos aprendamos máis sobre o homenaxeado no Día das Letras 2023. Aquí podedes ver as imaxes do expositor do corredor.
Nos vindeiros días irémolo completando con traballos en curso e outras cuestións de interese que vaiamos compilando. Que aproveite!!!
Por fin, a nosa exposición sobre Francisco Fernández del Riego, ao que nós xa nos referimos como Don Paco, en confianza. Aquí vos deixamos imaxes do expositor que podedes visitar no corredor da biblio con algunhas cousas curiosas sobre el, libros, revistas, fermosos traballos do alumnado de debuxo artístico (Don Paco visto por diversos artistas galegos), e unha decoración ben bonita na que as características gafas non poden faltar. Iremos achegando máis cousiñas que temos preparadas...
Feliz semana!
Outra vez estamos encantadas de contarvos que un dos nosos proxectos que con tanto agarimo e esmero sacamos adiante volveu obter un recoñecemento externo: o premio de Traballo por Proxectos 2022 na nosa categoría, convocado pola Consellería de Educación.
Música no Mosteiro foi o proxecto que traballamos durante o curso pasado e que continúa neste grazas a algún fantástico cabo solto que quedou no tinteiro.
Claro está que non podemos ser alleos ao formidable patrimonio que nos envolve: é natural integralo nas nosas propostas de traballo, poñelo en valor e que toda a comunidade educativa o coñeza e poida fachendear del. Neste caso, como sabedes, afondamos nos os tesouros musicais do mosteiro: coros, órganos, cantorais, dende a perspectiva musical e a plástica... e xa foi un premio darnos de conta en xuño da enorme produción e das fantásticas experiencias que vivimos neste proceso.
Deixamos aquí o taboleiro no que acumulamos todo ese traballo e aquí todas as entradas deste blog sobre Música no Mosteiro. Agardamos que vos guste! Feliz día de Santa Cecilia, patroa dos músicos!
Para estarmos entretidos durante estes meses estivais, deixámosvos un dos traballos do proxecto Música no Mosteiro que nos quedaban no tinteiro: o que realizamos sobre o noso fantástico órgano!
Como sabedes, moitísimos visitantes acuden á nosa vila con interese polo órgano, e da man da Fundación Curros e o Concello, coa colaboración da Parroquia, miles de escolares teñen visitado e escoitado o espectacular instrumento grazas aos concertos didácticos que son xa un referente na nosa comunidade e alén do Padornelo.
Este material elaborado polo grupo de 1º de Bacharelato da materia Linguaxe e Práctica Musical é un resumo das principais cuestións relativas ao órgano, instrumento cuxa complexidade non deixa indiferente a ninguén. Agardamos que grazas á nosa imaxe interactiva e aos nosos vídeos poidades coñecelo un pouco mellor. Seguiremos informando! Que aproveite!
Despois de fichar toca etiquetar! Como preparamos as etiquetas da sinatura para imprimir? Non vos perdades este último titorial (ata o momento) no que queda perfectamente explicado todo o proceso. E lembrade que aquí (e no apartado KOHEANDO) podedes consultar todos os nosos titoriais. Feliz fin de semana!
Continuamos celebrando os Días do Libro. Con esta fermosura de titorial están os compañeiros e compañeiras de Maceda mellorando a súa técnica encadernadora da man de Isidora Gil, que está realizando con eles unhas sesións de docencia do máis produtivo. Xa levamos uns aniños nesto, dentro do noso Proxecto Gutenberg, e teñen saído da nosa factoría os fantásticos titoriais "Encadernacións para manazas" que podedes visitar aquí.
Polo momento deixámosvos este material e mandamos un saúdo aos profes de Maceda que o están facendo tan ben.
Comezamos a última etapa do curso cunha nova entrega de KOHEANDO. De momento non temos intención de facer carnés físicos, pero KOHA dá esa opción, así que aquí vos deixamos este titorial por se alguén está interesado.
Chegamos a un dos puntos clave do noso titorial KOHEANDO: prestar e devolver referencias. Certamente é doado con esta ferramenta, sobre todo se temos lectores láser que nos facilitarán a lectura dos códigos e farán que tardemos moi pouquiño en facer estas xestións. Que vos aproveite!
Celebramos a nosa entrada número 701 presentándovos un dos resultados do noso proxecto Música no Mosteiro.
Achegámosvos este ameno documental de divulgación no que o alumnado de Linguaxe e Práctica Musical de 1º de Bacharelato nos conta as características principais do Canto Gregoriano ou Canto Chan, do que elaboraron colaborativamente o guión e que foi montado por Carlos Alonso na Aula de Audiovisuais do centro.
As fantásticas imaxes son do noso mosteiro, e a banda sonora é unha interpretación propia do "Pange Lingua" (More hispano) , peza que se cantaba na procesión do día de Corpus Christi.
Hoxe, no noso titorial KOHA por entregas, KOHEANDO, aprenderemos a dar de alta a potenciais usuarios da nosa biblio.
Como todo o alumnado está xa dado de alta a estas alturas de curso, poñemos o exemplo dunha persoa externa. E aproveitamos para recordarvos que abrimos en horario non lectivo martes, mércores e xoves de 15.30 a 17.10.
Pica na imaxe para ver o titorial!
Supoñamos que queremos facer unha pescuda moi concreta no noso grande catálogo. Como refinala para atopar, cribados, os resultados máis idóneos? Aquí tes a resposta! Agardamos que esta entrega de KOHEANDO sexa de utilidade!
Achegámosvos unha nova entrega do noso titorial KOHA por capítulos.
Queres facer unha pescuda de recursos multimedia sobre un tema? Queres facer unha pescuda polo miúdo filtrando a información? Este é o teu tutorial. Agardamos que esta nova entrega de Koheando vos sexa de utilidade!
Bo día!
Hoxe toca kohear! Aprenderemos a realizar a catalogación derivada. Agardamos que sexa de utilidade!
