Algunha cousiña máis de Rosalía!

 Presentamos este vídeo informal no que o alumnado de 2ºB recita a Rosalía. Que está sen preparar? Si. Que Rosalía é un valor absoluto con ensaio e sen el? Tamén! 

Video de Youtube Cuenta Atras Reloj Negro de Biblio Poleiro

Día das Escritoras

 Hoxe é o Día das Escritoras. Por suposto, todos os días o son, pero hoxe un pouquiño máis. Iremos partillando as lecturas compartidas de textos con Voces de Muller que fixemos nalgunhas aulas: sempre é bo momento para a lectura compartida e para poñer no seu sitio á metade da humanidade silenciada. Estiveron con nós as letras de Chus Pato, Rosalía de Castro, Emilia Pardo Bazán, Gloria Fuertes, Leonor de Aquitania, Alfonsina Storni... e moitas máis!

Feliz día!

Os nosos actos do 8M

 Por mor dunha alerta meteorolóxica, os actos de visibilización do 8M non puideron ir adiante na súa data: tivémolos que adiar para o pasado día 15.

Reunido todo o centro no pavillón polideportivo, e tras unhas palabras moi emotivas da profesora do departamento de Lingua e Literatura Teresa Devesa Graña, o baile e a actividade física foron os protagonistas da xornada. Como dixo Teresa, facendo súas e reinterpretando as palabras de Martin Luther King, o noso soño sería que non houbera necesidade dun 8 de marzo. Ogallá.

Deixámosvos testemuño audiovisual das actividades.

Arte vs VdG xa está no noso corredor.

 Dende a semana pasada colgan do noso corredor os cadros da exposición Arte vs VdG, arte contra a violencia de Xénero, de Ana Peaguda, nas súas palabras, "unha exposición itinerante para reflexionar, visibilizar y reaccionar ante un grave problema de Saúde Pública a través dunha mostra gráfica."

Ela mesma brindouse a explicar ao alumnado de bacharelato o sentir da exposición e os referentes literarios e sociais que emprega. Aquí vos deixamos unha mostra.

O que sucedeu o pasado venres en Celanova: conmemoración do 25N multitudinaria.

 A praza da nosa vila encheuse de xente o venres. Os actos conmemorativos do 25N tiveron aos centros educativos da mancomunidade como protagonistas. Representantes de varios concellos e alumnado de todas as edades participaron aportando manifestos, cancións, poesías e sobre todo, conciencia. Parabéns, sobre todo ao noso alumnado de oratoria, que nos representou magnificamente. 

Aquí vos deixamos un resumo en fotos e vídeo. 

Pica na imaxe para acceder ao album completo.

Por certo: tamén a prensa recolleu o acto!

La Región

Deixámosvos, coma sempre, o enlace a todas as entradas desta bitácora sobre este tema.

Simplemente, unha muller.

Unha biblioteca é un espazo cheo de libros, películas, cómics... que se moven; que se moven coma os ratos de Celso Emilio: "Un rato é unha cousa que se move"; nas bibliotecas tamén hai "ratos"; eses "ratos"particulares son as persoas, persoas coma Belén Sánchez, que creou, moveu, liscou, traballou, viviu, amou e fixo que a nosa biblioteca sexa hoxe o que é; por iso será a nosa sala de lectura "Belém Sánchez" no momento do seu xubileo.                                                            

Falaba con palabras

que semellaban pombas.

As cousas á súa beira

púñanse brancas.

Nascíalle nos ollos un abrente

coma un río de luz,

ou coma un mar lonxano de gueivotas.

Celanova, 8M de 2023

Baldomero Moreiras en Radio Clásica, e Carmen de Burgos na nosa Sala Gótica

 Partillamos este podcast da sensacional entrevista que o programa Longitud de Onda de Radio Clásica fixo o día 9 ao artista gráfico Baldomero Moreiras, da nosa vila, artista fantástico e home "bo e xeneroso", que nos colabora en todo.

Pica na imaxe da portada do catálogo da exposición "O Eco das Amazonas" para escoitar o podcast!!!!

Neste enlace podes ver a lista de fondos relativos a Baldomero Moreiras, algúns doados por el mesmo, que temos na biblioteca. Tamén é obra súa o cartaz do acto de homenaxe aos fusilados da guerra civil en Celanova, que como vos informamos fai uns días, xa está instalado. 

EDITAMOS...! Hoxe mesmo, no acto que vos anunciamos onte, "Memoria histórica e dereitos humanos", realizouse a entrega oficial do cartaz ao noso centro, así como da placa das Escolas da República, que a familia do propio artista, a través do Comité de Memoria Histórica Terras de Celanova, cedeu para que sexa custodiada no IES.

Ademais temos o gran placer de amosarvos outra fermosísima doazón que fixo ao noso centro: unha das obras da colección da que fala na entrevista, O Eco das Amazonas, en concreto a de Carmen de Burgos, moi axeitada para estar pendurada dos nosos muros. Estamos moi agradecidos!

Mañá é o Día da Muller e a Nena na Ciencia

 Hoxe achegámosvos o calendario científico que cada ano promove o CSIC. Pica na imaxe e accede á web para poder descargalo en diversos formatos.

Accede dende este enlace á páxina oficial do 11 de xaneiro, Día da Muller e a Nena na Ciencia.

Nós no IES tamén intentamos promover referentes femininos STEM con diversas actividades. Por exemplo, alá polo mes de decembro (pica aquí para ver a entrada completa) recibimos a dúas voluntarias da ONG Enxeñería Sen Fronteiras, Martina Páramo e Lucía Amaro (Telecomunicacións) que nos contaron a súa experiencia na ciencia. Así o partillamos no seu día no boletín trimestral de información ás familias:

A propia ONG no seu programa Hackers Sen Fronteiras, no que como sabedes participamos por primeira vez neste curso como centro piloto, fomenta estas actividades e a súa base social, voluntarias neste caso, axúdannos a ter referentes femininos na ciencia. Aquí podes acceder á presentación que amosaron ese día.

Neste enlace podes acceder ás otras entradas desta bitácora relacionadas co tema, que son variadas e interesantes.

Referentes científicos femininos para rematar a semana

 E rematamos esta primeira semana do trimestre con este fermoso calendario: ciencia en feminino. Achegóunolo a asociación sen ánimo de lucro La ciencia es femenino, que traballa para dar visibilidade ás científicas galegas e que sexan referentes para o noso alumnado. Divulgan a súa actividade, entre outros medios, a través dun programa de radio quincenal dedicado aos avances científicos e ás experiencias das que hoxe traballan neses campos. 

Pica no enlace e bótalle unha ollada ao calendario!

Desenvolvemento sostible, soberanía alimentaria e mulleres STEM con Hackers Sen Fronteiras

 O pasado día 5 de decembro recibimos a Sergio Fernández, de Enxeñería Sen Fronteiras Galicia, que realizou tres charlas-obradoiro sobre soberanía alimentaria e desenvolvemento sostible. Esta actividade pertence ao programa no que participamos como un dos tres centros piloto de Galicia, Hackers Sen Fronteiras. O programa consiste en que a ONG envía especialistas a realizar charlas e obradoiros aos centros sobre diversos temas de sensibilización en torno á tecnoloxía para o desenvolvemento humano, así como asesoramento e materiais. Como a nosa vindeira campaña 2023 xirará en torno á comida, que mellor que comezar informándonos sobre este tema?

Así, durante as charlas o alumnado puido constatar como o modelo actual de produción e consumo non é sostible, e dá lugar a desigualdades, malgasto dos recursos, contaminación e un longo etcétera de consecuencias negativas.

O facilitador cedeunos os materiais empregados por se queremos nalgún momento repasalos: algúns vídeos moi axeitados e unha presentación con datos moi interesantes. Pica nas imaxes para acceder.

Tamén recibimos, o mesmo día, a Martina Páramo e Lucía Amaro, enxeñeiras de telecomunicacións e voluntarias da ONG, que partillaron na nosa biblio as súas experiencias como mulleres de ciencia. 

Mulleres novas e moi ben preparadas que poden ser referente e motivación para o noso alumnado, e que moi amablemente tamén nos cederon a presentación informativa que prepararon para o evento. Graciñas!!!

Emilia Pardo Bazán, a violencia de xénero e as alumnas que retornan.

 Poderiamos meter esta entrada no apartado "cousas riquiñas que pasan na nosa biblio"... Encántanos que as nosas exalumnas volvan ao centro como profes en prácticas, e gústanos aínda máis que o fagan con esta enerxía e creatividade.

Así presenta ela esta actividade audiovisual que abordou co noso alumnado:

"En relación co currículo educativo, no que se impón a obrigatoriedade e importancia de traballar de maneira transversal a igualdade entre homes e mulleres e a prevención da violencia de xénero, deseñouse unha práctica docente cuxo obxectivo é dar maior visibilidade entre os adolescentes a dita problemática social e analizala a través dalgúns contos de Emilia Pardo Bazán (1851-1921), quen quixo dar voz ás súas conxéneres e destapar as miserables situacións das que eran vítimas —subordinación, ameazas, insultos, etc.—, moitas delas aínda vixentes na actualidade. Para lograr os obxectivos propostos contouse coa participación do alumnado de Literatura Universal de 1º de Bacharelato do curso 2021-2022, que convertidos en actores e actrices durante uns días, realizaron dúas curtametraxes que versan sobre a violencia de xénero. Para isto baseáronse en dous contos da autora galega: La puñalada e Los huevos arrefalfados. Na curta Los huevos arrefalfados, os alumnos e as alumnas tentan fomentar e remarcar a necesidade de por freo e denunciar as situacións de maltrato, tanto dende a posición da vítima como dende o propio entorno, posto que en ocasións a persoa que as sofre non ten a capacidade ou os medios precisos para facelo. Este traballo puido levarse a cabo grazas á axuda de Mº Teresa Devesa Graña e Carlos Alonso Abad, profesores do IES Celanova Celso Emilio Ferreiro, que me concederon o tempo e os medios necesarios así como a cooperación e os consellos fundamentais para acadar o resultado final, e de María López Sández, profesora da Universidade de Santiago de Compostela e titora deste TFM, que estivo atenta a todo o proceso e resolutiva ante as dificultades e as modificacións precisas."

Parabéns, Emma Valado Vilariño!

11F: Día da Muller e a Nena na Ciencia

 A web da ONU cóntanos que dende 2016 o día de hoxe ten que servir para visibilizar dúas realidades vitais para o desenvolvemento humano: a igualdade de xénero e a ciencia.

Nós somos da mesma opinión, así que aí van as nosas aportacións, que estarían moi ben para utilizar nas Horas de Ler destes días: aquí achegamos unha morea de recursos que fomos recollendo nesta bitácora durante cursos pasados.

Rosalía, pioneira (Miguel Robledo)

Non deixedes de visitar as nosas escolmas e materiais propios, da nosa campaña Voces de Muller:

Mulleres matemáticas

Mulleres científicas

E de pasarvos pola biblio e levar algunhas das nosas fantásticas referencias sobre o tema, por exemplo:

Tamén son moi interesantes os calendarios científicos do CSIC, que xa van pola súa terceira edición e que xa partillamos no noso blog.

Navegando pola rede podedes atopar moreas de recursos fantásticos, pero hoxe recomendámosvos que vos acheguedes á web de ESF Galicia (Enxeñería Sen Fronteiras), onde están traballando moito para visibilizar os perfís STEM femininos, entre outras cousas. Cada mes lanzan o seu BOE (Boletín Oficial Esfeiro) con novas relativas á tecnoloxía para o desenvolvemento humano. Entre outras das súas actividades, colaboran con centros educativos, e nós agardamos ser o próximo! 

Outra recomendación, recén saída do forno, son os vídeos de divulgación do IDIVAL (Instituto de Divulgación de Valdecilla), nos que eminentes científicas explican as liñas de investigación que están a desenvolver. Neste vídeo en concreto é Marta Alonso Peña, Doutora en Fisiopatoloxía e Farmacoloxía pola Universidade de Salamanca, quen nos explica o proxecto Cohorte Cantabria, do que é coordinadora: un estudo único e pioneiro que permitirá avanzar no coñecemento das enfermidades. Un sopro de esperanza neste ambiente pandémico.

Aquí deixamos o vídeo. Porque precisamos referentes! 

Montaxe final: Mulleres e literatura, 8 de Marzo

 Hoxe achegámosvos un vídeo no que resumimos o traballo que o Departamento de Lingua Castelá elaborou para o día 8 de Marzo, porque, si, xa sabedes que para nós calquera día é o Día da Muller.

Agardamos que vos guste! Noraboa a profesorado e alumnado polo esforzo e o resultado!

Vídeo de presentación das candidaturas ao Premio Galego de Educación para o Desenvolvemento e a Cidadanía Global

 Como vos contamos fai uns días, asistimos á reunión virtual dos finalistas e premiados neste fantástico certame no que tivemos o gusto de participar, o Premio Galego de Educación para o Desenvolvemento e a Cidadanía Global, e hoxe, a Coordinadora Galega de ONGD envionuos o xenial vídeo que elaborou presentando as candidaturas. Non podemos deixar de compartilo porque é fermoso vernos aí como finalistas coa nosa campaña Cómprame a Igualdade e porque é fermoso ver a cantidade e calidade de proxectos que os centros educativos aportaron. 

Non hai pandemia que poida con nós!

Nós participamos na Categoría B:

Partillamos tamén o vídeo da Categoría A:

Participamos na reunión virtual de recoñecidos do certame da Coordinadora Galega de ONGD

Onte pola tarde tivemos o inmenso placer de participar nunha reunión virtual á que fomos convocados os representantes dos centros gañadores e, no noso caso, finalistas, da primeira edición do Premio Galego de Educación para o Desenvolvemento e a Cidadanía Global que convocou a Coordinadora Galega de ONGD.

Xa en xaneiro partillamos nesta bitácora a nosa ledicia polo recoñecemento, e hoxe tivemos a oportunidade de gozar deste encontro.

Foi moi interesante coñecer os outros proxectos: a organización elaborou uns fermosísimos vídeos-resumo de cada unha das iniciativas que nos deixaron abraiadas. Imaxinamos que o noso, Cómprame a Igualdade, tamén abraiaría, a lo menos un pouquiño. O importante é ver cantos centros, docentes, alumnado e comunidades educativas en xeral están implicados nunha mellora da educación e da sociedade. É fantástico.

Tivemos tempo tamén para charlar un pouquiño entre nós, e finalmente, escoitar a experiencia doutra invitada virtual, tamén mestra: a boliviana Lita Gonzales, integrante do grupo Cholitas Escaladoras, un grupo de mulleres aimaras alpinistas que coa súa actividade deportiva fan unha laboura fantástica de empoderamento da muller e promoción da súa cultura, e xa son un referente mundial. Podedes ver aquí un dos seus vídeos, pero as redes están repletas de vídeos e artigos que falan moito e ben delas.

O feito é que quedamos encantadas do encontro: noraboa a todos, grazas pola convocatoria e que continúe celebrándose por moito tempo. 

O noso taboleiro 8 M xa está rematado!

 E ben bonito que quedou. Fai un percorrido polas mulleres maltratadas, as que fan florecer, as descoñecidas ou as reivindicativas. Un fermoso traballo do alumnado de 2º ESO e a súa profe Merchi Seara!