mércores, 3 de marzo de 2021

Preparando o 8 de Marzo

Así estamos a preparar o día 8 de Marzo: Cunha instalación na Sala do Profesorado na que recomendamos lecturas e actividades para visibilizar o Día da Muller con cada un dos grupos. Deixámosvos unhas fotos e o texto do aviso, que pensamos que é convincente.




ATENCIÓN, ATENCIÓN: AVISO AO PROFESORADO!


 HORA DE LECTURA DO DÍA

4 DE MARZO

A 5ª HORA

Propoñémosvos una actividade: Deixámosvos en caixas na Sala de Profesores unhas suxestións de textos (escolma de poesía e material didáctico de elaboración propia) para conmemorar o

DÍA DA MULLER

da mellor maneira: lendo obras delas e sobre elas.

Durante a sesión podedes sacar unhas fotos ou facer uns vídeos e enviárnolos a bibliotecapoleiro@gmail.com para facer unha montaxe e subila o día 8 de marzo ao blog e a web do centro. O mesmo se nas vosas materias ou nas horas de titoría estades a facer proxectos neste campo, achegádenos material gráfico para que sexa difundido polas nosas canles. 

O material que collades das caixas da sala de profes, por favor, deixádeo de volta nelas ao rematar a sesión.


luns, 1 de marzo de 2021

Regaliño de Uxía Oviedo para a nosa biblio

A artista gráfica Uxía Oviedo agasallounos con este fermoso detalle que nos axudou a celebrar o Día de Rosalía, aínda que sempre dicimos que todos os días poden selo. Mesmo hoxe, que é o festivo local na nosa vila e celebramos a San Rosendo. Aquí vos deixamos o enlace á súa canle de youtube, e podedes seguir o seu traballo en redes. Atentos e atentas, que dará que falar.




venres, 26 de febreiro de 2021

Recital informal do Día de Rosalía

O prometido é débeda: aquí vos deixamos o noso Recital Informal: porque calquera momento ou lugar son bos para ler, recitar e gozar da nosa Rosalía... Si, con mascarilla tamén. E con barullo de fondo. Que aproveite!



xoves, 25 de febreiro de 2021

"Especial Pandemias", oitava entrada: As pandemias na literatura e no cine

 Ás veces o ser humano saca o mellor de si para sobrepoñerse á adversidade. Así, as situacións de desgracia teñen inspirado dende sempre grandes creacións. Aquí vos deixamos algúns exemplos de como as pandemias que asolaron e asolan á humanidade deron pe a obras literarias e cinematográficas. 


mércores, 24 de febreiro de 2021

Rosalía 2021

De novo chegamos ao 24 de febreiro, pandémico neste 2021 pero con ganas de celebrar á nosa poetisa que levaba na frente unha estrela e no bico un cantar.

Hoxe realizamos un asalto poético no que o alumnado recitou poemas improvisadamente en diversas localizacións do noso fermoso mosteiro. Mentres montamos o vídeo, que partillaremos nos próximos días, deixámosvos aquí todas as actividades referidas a esta conmemoración que temos no noso blog, que son unhas cantas. E o noso catálogo por se queres vir á biblio a levar algo. Que aproveite! Feliz día de Rosalía!


martes, 23 de febreiro de 2021

Desmontando bulos e practicando o pensamento crítico.

Hoxe, da man de Ciberespect (activismo dixital contra o odio e a desinformación) deixámosvos estas dúas infografías ben interesantes:

Na primeira delas podemos ver como se articula o discurso do odio, baseando a miúdo os seus argumentos nestes catro mecanismos:

Picade na imaxe para ampliala.


Por outra banda, hai que previr acerca dos sesgos / nesgos cognitivos que distorsionan a nosa interpretación da información:

Picade na imaxe para ampliala.



luns, 22 de febreiro de 2021

Máis recursos Visual Thinking!!! Civilizacións antigas.

 A nosa compañeira Marta Varela segue a darnos sorpresas así de fermosas, desta vez deixámosvos estas infografías sobre Exipto, Mesopotamia e Grecia. A gozalas!