Casares segue dando sorpresas: A segunda entrega de Casares ilustrado.

Casares na Bibliopoleiro: O Padlet

Presentámosvos o taboleiro no que reunimos o material elaborado neste noso grupo de traballo deste curso. Como sabemos, faltan cousas, por exemplo o resultado final das nosas teatralizacións, que se farán efectivas no salón de actos o día 23 de xuño para pechar o curso... estamos traballando nelo!

Casares ilustrado

E continuando co noso proxecto (Casares na Bibliopoleiro) aí temos os primeiros e xeniais produtos do noso traballo: o alumnado de 2º de bacharelato de Debuxo Artístico achéganos estas fermosas ilustracións...

Casares nas biblios escolares

E velaquí esta escolma da morea de actividades que as bibliotecas escolares ao longo da nosa xeografía levan realizado para celebrar as Letras 2017. E moitas máis que quedarán, así que iremos actualizando o padlet. Nós mesmos, inmersos no proxecto "Casares na Bibliopoleiro" temos na incubadora moito material que irá saíndo á luz en breve...

Quiz das Letras Casares 2017

Mirade que quiz tan chulo vos temos preparado para celebrar as Letras! Toda a información para acertar tódalas preguntas está na exposición do corredor de abaixo, así que bótadelle un ollo e atrevédevos a responder as preguntas!

Casares na Bibliopoleiro!

Presentámosvos o grupo de traballo que temos en marcha este ano para celebrar a Casares como merece. Tras mercar para a biblio todo o que nos faltaba da súa obra, aquí estamos traballando os seus textos (o alumnado sábeo ben), para facer unha antoloxía propia, e, como guinda do pastel, ilustrándoos e encadernándoos.

Hoxe temos a nosa primeira sesión de formación, que corresponde á ilustración de textos, mais a finalidade desta docencia non é facérmonos todos uns pintores reputados, non, senón afondar nos aspectos didácticos e creativos da ilustración para lectores novos.

En resumo, trátase dun proxecto no que profesorado e alumnado seremos protagonistas durante toda a produción do material, incluíndo a súa encadernación (que xa a dominamos grazas aos grupos de traballo do proxecto Gutenberg de anos anteriores), como se a Biblio fora unha especie de empresa editorial.

Seguiremos informando, pero mentres deixámosvos co xenial Marcos Viso que será o noso profe de ilustración. É un ourensán, arquitecto técnico de profesión, que un bo día, nas súas propias palabras, "olvidé ponerme el casco blanco y empecé a dibujar lo que soñaba."

Podedes entrar na súa web para coñecer mellor a súa obra, e aquí tendes un taboleiro coas súas ilustracións magníficas. Que aproveite!