E finalizando o curso... a Peza do Verán!

 E que mellor que unha viaxe cultural para celebrar o descanso estival? (Menuda rima!)

Pescudando polo centro adiante atopamos unha fermosísima memoria que compañeiras de antano fixeron sobre unha viaxe cultural para o alumnado de ciclos. Non lle falta de nada: itinerario, obxectivos, memoria económica... Un traballo ben rigoroso que as compañeiras profesoras do IES no ano 1983 deixaron para a posteridade.

E o tema do mes, por suposto, son as vacacións: A súa regulamentación, os cambios ao longo da historia ou a xestión dos festivos escolares.

Preme na imaxe e accede ao documento completo.

E neste enlace para visitar todas as Pezas do Mes. 

A Peza do Mes, o vinilo Maruxa, xa en exposición física

 Pásate polo noso corredor e verás que bonita quedou a vitrina dedicada á tradición oral... Cantareiras, partituras, vestiario e outros obxectos compoñen un conxunto ben orixinal, acompañado das explicacións correspondentes. En breve, a presentación. Aquí, toda a información sobre peza e contexto. e AQUÍ todas as pezas do mes. Seguiremos informando. 

Por certo, non esquezas participar no Concurso de Coplas!!!!!!!

Benvido maio... coa súa Peza do Mes!

Mañá, despois do apagón e do día de descanso, comeza maio, e celebrámolo adicando a nosa Peza do Mes á tradición... Un disco de vinilo histórico que reproduce, a zarzuela Maruxa, que quixo ser ópera!

Con esta peza queremos homenaxear, ao igual que o Día das Letras 2025, á tradición oral que conservou a nosa música durante séculos, música que tamén inspirou composicións de todos os xéneros dentro e fora das nosas fronteiras, como esta obra musical escénica.

Preme na imaxe para acceder ao documento informativo completo... En breve, a peza do mes estará xa fisicamente na nosa vitrina, acompañada por outros referentes interesantes.

Neste enlace podedes atopar as entradas do histórico de Pezas do Mes.

Con todas vós, a Peza do Mes de abril: A nosa Polaroid!

 Xa está na súa vitrina a nosa Polaroid, procedente, como todas as Pezas do Mes, do noso fondo museístico, e acompañada por libros e outros obxectos que a contextualizan, conxunto que neste caso chamamos "A fotografía: fixar a vida". 

Á espera da súa presentación, deixámosvos as fotos (que non fan xustiza á realidade) e a información detallada do exposto.

Pica na imaxe para acceder ao documento completo. 

Aquí podes consultar tódalas Pezas do Mes!

Benvida a marzo coa nova Peza do Mes: Láminas e instrumentos de Debuxo Técnico.

 Montada a vitrina, e aínda por confirmar  presentación, xa vos deixamos unhas imaxes e o material informativo que non ten desperdicio!

A nosa peza do mes: Follas Novas

 Xa achegamos fai uns días, para celebrar a chegada do mes de Rosalía, a información sobre a nosa Peza do Mes, un facsímil de Follas Novas.

Velaquí as imaxes da peza, que certo é, loce moito máis en directo.

Peza do mes de febreiro: O mes de Rosalía

 Xa temos preparada a peza do mes de febreiro, como non, o mes da nosa Rosalía. Aquí vos deixamos o material informativo e en breve teremos novas sobre a presentación da peza. Que aproveite.

Por fin! Presentamos a Peza do Mes de xaneiro

 Coa zarzuela soando polo altofalante, por fin puidemos presentar a nosa Peza do Mes. O alumnado pianista encargouse do asunto e pasamos un momentiño simpático durante o recreo de onte.

Grazas a alumnado e profesorado asistente e ás pianistas polo ben que explicaron o marabilloso mundo da codificación e captura da música! Aquí, o material informativo de todo o que nos contaron.

Mañá presentamos a Peza do Mes de xaneiro: Rolo de pianola

ACTUALIZAMOS! POR RAZÓNS ALLEAS Á NOSA VONTADE, ADIAMOS A PRESENTACIÓN PARA O XOVES 23!!!!

Podes consultar aquí o material informativo

PEZA DO MES: Rolo de Pianola

 En xaneiro presentamos nova peza do mes: un rolo de pianola! Sirve para accionar un instrumento mecánico chamado así, pianola, e fai que soe a música correspondente sen necesidade de pianista.

Aquí, no material que preparamos, explícavolo todo moi ben, e relaciona este tema cos medios de codificación e reprodución da música: dende as partituras ás plataformas de descarga. Achegádevos a ver a nosa vitrina ao corredor da biblio!

Presentación da Peza do Mes de decembro a cargo do alumnado de 1ºFPB: o TOM TOM

 Como non podía ser de outra maneira, o alumnado de FPB presentou estupendamente a nosa Peza do Mes de decembro, o TOM TOM. 

Faláronnos dos mapas da antigüidade, no Imperio Romano, dos mapas físicos que nos acompañaron nos coches e que deron lugar ás hoxe famosas Estrelas da hostalería, do Tom Tom e o seu desempeño "dubidoso" ou dos viaxeiros e viaxeiras ilustres que visitaron Celanova. A cousa ía de viaxes!

Picade aquí para ver a documentación completa sobre o TOM TOM.

Mañá inauguramos unha nova actividade: A presentación da Peza do Mes

 

Inauguramos sección! PEZA DO MES

 Como os grandes museos, inauguramos unha nova sección: a Peza do Mes. 

Tan sinxelo como elixir unha peza, documentala e arrodeala de referentes diversos para expoñela elaborando un material informativo do máis interesante.

Desta volta, un TOM TOM da vella escola é o protagonista da nosa vitrina expositiva. É a representación das viaxes, de descubrir, de perderse... e tamén de indagar: quen veu visitar o noso mosteiro? 

Atopa todas estas curiosidades accedendo ao seguinte documento! E a partir de agora, atentos e atentas ás vindeiras Pezas do Mes!