23F, Día de Rosalía

Celebramos o Día de Rosalía abordando a súa xenialidade dende unha perspectiva "de campaña". 

De que campaña? Pois da nosa, da actual campaña da biblio Un mundo feliz? : hoxe presentámosvos á Rosalía ecoloxista, "pintora" e defensora da paisaxe da súa amada terriña. 

Pioneira como ela foi, nós non quixemos ser menos, e achegámosvos os novos materiais a través dunha plataforma de contidos multimedia que estamos a estrear: Wakelet. Agardamos que gocedes da escolma de poesías paisaxísticas, da presentación con pinturas e ilustracións da paisaxe galega ou dos recitados do alumnado en audio que iremos ampliando na nosa canle Soudcloud.

Atentos e atentas, que nos próximos días Rosalía seguirá con nós... 

Non queremos deixar de convidarvos a que lle botedes unha ollada a todas as referencias a Rosalía neste blog, para que vexades que sempre a temos moi presente. Parabéns no teu día, Rosalía!

Rosalía pioneira. Miguel Robledo

23F, celebramos a Rosalía

 Chegou o día de celebrar máis ca ningún outro á nosa Rosalía. Á boa. Á de Castro.

Este ano ímosvos contar algo que ocorreu fai pouquiño, nunha excursión do alumnado de música a Santiago. Reservada a visita do Pórtico da Gloria, para admirar, sobre todo, os seus instrumentos pétreos, ocorréusenos a fermosa idea de que o alumnado recitase, in situ, o poema que Rosalía escribiu inspirada na obra "D'inmortal nome Mestre Mateo", e facer un vídeo homenaxe. Pero quixo o fado que as normas turísticas, encarnadas no persoal de seguridade, non nos permitiran realizalo, sen posibilidade de negociación.

Tamén o fado quixo que, pola tarde, cando fomos visitar o Museo do Pobo Galego, estivera aberta a igrexa de Bonaval, co seu Panteón de Galegos Ilustres. Foi alí, fronte ao mausoleo de Rosalía, onde por fin puidemos recitar o poema que levabamos preparado:

O sol poniente, polas vidreiras  

D'asoledade, lanza serenos

Rayos, que firen descoloridos

D'a Groria os anxeles y o Padre Eterno.

Santos e apóstoles, védeos! parecen

Qu'os labios moven, que falan quedo

Os uns e os outros, e aló n'altura

D'o cue a música vai dar començo,

Pois os groriosos concertadores

Tempran risoños os instrumentos.

Estarán vivos? serán de pedra?

Aqueles sembrantes tan verdadeiros,

aquelas túnicas maravillosas, 

aqueles ollos de vida cheos?

Vos qu'os fixeches de dios c'axuda

D'inmortal nome Mestre Mateo...

Aquí, neste enlace, poderedes ver o vídeo, dende o blog de Dinamización do IES.

E nestoutro, todas as entradas do Día de Rosalía nesta bitácora.




Por último, a nova do día: na vila de Celanova, ímolo celebrar cun Caldiño de Gloria.

Aquí o enlace á prensa!

Algunha cousiña máis de Rosalía!

 Presentamos este vídeo informal no que o alumnado de 2ºB recita a Rosalía. Que está sen preparar? Si. Que Rosalía é un valor absoluto con ensaio e sen el? Tamén! 

Video de Youtube Cuenta Atras Reloj Negro de Biblio Poleiro

Celebrando a Rosalía

Esta é a nosa humilde homenaxe á grande Rosalía de Castro. Humilde, e sinxela, mesmo un pouco informal e moi, moi espontánea... Case en forma de "intervención poética repentina", porque a boa literatura pode encher calquera momento, situación ou lugar. E porque xa o dixo o noso Curros: "... na frente unha estrela, no bico un cantar."

Feliz aniversario, Rosalía!!!

Celebramos o Día de Rosalía

Como cada ano, queremos celebrar esta data tan significativa... Velaquí o noso catálogo de obras de Rosalía e sobre Rosalía.

E aproveitamos así para presentarlles o novo blog do noso EDLG, IES Celanova Poleiro, que se inaugura, como non, cunha entrada rosaliana.
Para máis información e recursos, visita a xenial entrada que os amigos do CEIP de Friol colgaron no seu blog, O Lar de Frianciño.

Peza do mes de febreiro: O mes de Rosalía

 Xa temos preparada a peza do mes de febreiro, como non, o mes da nosa Rosalía. Aquí vos deixamos o material informativo e en breve teremos novas sobre a presentación da peza. Que aproveite.

Recital informal do Día de Rosalía

O prometido é débeda: aquí vos deixamos o noso Recital Informal: porque calquera momento ou lugar son bos para ler, recitar e gozar da nosa Rosalía... Si, con mascarilla tamén. E con barullo de fondo. Que aproveite!

Máis escritoras

 Recollemos traballos rezagados do alumnado de FPB que tamen merecen aparecer no noso blog.

Bibliopoleiro · Hora tras hora, día tras día (Rosalía de Castro). Por Jose Luis

Bibliopoleiro · Mi Carita Redondita (Gloria Fuertes). Por Juan Carlos

Bibliopoleiro · Rosalía De Castro. Por Noel

Bibliopoleiro · Agatha Christie. Por Cristina.

E así celebramos o día de Rosalía!!!

Como sempre dicimos, todos os días poden ser o día de Rosalía. Esta semana, nas horas de lectura estivemos traballando unha escolma de textos da nosa grande nos que reivindicou especialmente á muller. Agardamos que vos guste a nosa montaxe en vídeo! É a nosa humilde homenaxe á escritora galega máis universal.
Por certo, hoxe é o 80 aniversario da morte doutro grande: Antonio Machado, que, como el mesmo dixo, tomouna como referencia en temáticas e métricas. O dito, que gocedes do noso traballo!

A Fundación Curros Enríquez da nosa vila realiza, como cada ano, unha programación moi especial para estes días. Achegámosvos os actos principais, pero podedes entrar na súa web para máis información. Animádevos a participar!!!

Máis Rosalía!!!! Alborada

 Hoxe fixemos unha falcatruada: asaltamos a biblioteca para, con piano, gaita e pandeireta, interpretar a Alborada de Rosalía, musical e literariamente.

Foi un petisco breve que nos deixou moi bo sabor de boca!

Miña casiña, meu lar!

Onte celebramos a Rosalía cun caldiño ben saboroso! E recitando o poema que contén a receita! O Departamento de Galego meteunos en danza e fixemos unha lembranza ben riquiña do gran día.

Deixámosvos testemuño audiovisual: o audio é terrorífico, pero veredes o bo ambiente que tivemos no recreo co reparto do Caldiño de Gloria. Seguiremos informando!

Día de Rosalía de Irmafernandez

Letras Galegas no CEIP Curros Enríquez da nosa vila

Mirade que vídeo máis chulo fixeron os do Curros!

Comeza cunha parte dedicada a Rosalía, na que podemos escoitar a canción de Uxía "Rosalía pequeniña" e a continuación un precioso recitado a cargo dos pequechos, e ver un montón de debuxos ben bonitos.

A continuación, uns pequenos-grandes regueifeiros fannos un resumo da vida de Mª Victoria Moreno e finalmente, preséntannos algúns dos seus libros con banda sonora de Fuxan os Ventos, que para este ano crearon unha musicalización dun poema da homenaxeada, "Lúa de Prata".

Tamén aparecen algunhas imaxes do libro "María Victoria Moreno- Mulleres Bravas da nosa Historia" de ed. Urco escrito por Eli Ríos.

O dito, que o vídeo non ten desperdicio!!!!

Aquí vos queda, a continuación, pero non deixedes de entrar no seu blog da biblio: Biblioteca Canistrel, que teñen máis cousas bonitas. Noraboa, compañeiros!

Rosalía 2021

De novo chegamos ao 24 de febreiro, pandémico neste 2021 pero con ganas de celebrar á nosa poetisa que levaba na frente unha estrela e no bico un cantar.

Hoxe realizamos un asalto poético no que o alumnado recitou poemas improvisadamente en diversas localizacións do noso fermoso mosteiro. Mentres montamos o vídeo, que partillaremos nos próximos días, deixámosvos aquí todas as actividades referidas a esta conmemoración que temos no noso blog, que son unhas cantas. E o noso catálogo por se queres vir á biblio a levar algo. Que aproveite! Feliz día de Rosalía!

Rosalía na nosa biblio... Sempre.

Xa cuns días de retraso, pero coa mesma boa intención, lembramos a Rosalía e lembrámosvos que na nosa biblio podedes atopar un feixe de obras sobre ela.
Este é o noso catálogo, xa podedes botarlle una ollada!

Que ben o pasamos no teatro!!! O club de lectura vai de excursión.

Perdoade o retraso, pero é que andamos a cen! Mais agora vos vai o post detallado das nosas actividades do día 18 febreiro.

Mañá completiña: primeiro, visita ao conservatorio, onde Marisol Mendive nos acolleu e nos explicou o funcionamento do instrumento órgano que nos abraiou coa súa complexidade e coa súa sonoridade. Mesmo tivemos mini concerto, da propia profesora de órgano Marisol e das nosas profes de música tocando o órgano a catro mans e catro pés.

A continuación demos un paseíño ata o centro e chegamos ao Teatro Principal, onde as nosas entradas para Variedades xa estaban reservadas. Sentámonos no patio de butacas e... a disfrutar! Pequenos fragmentos teatrais foron poñendo ante os nosos ollos diversas situacións, moitas delas reivindicativas dos problemas aos que se enfronta a sociedade de hoxe. Dende un informativo surrealista ata a historia de por que as ras lle cantan a lúa, pasando por uns parados laborais viaxeiros do tempo na percura dun traballo digno. Outros centros educativos enchían o teatro, e penso que todos saímos contentos da experiencia.

Aproveitamos o desprazamento para recitar a Rosalía alá onde fomos... os nosos recitados aparecen no vídeo homenaxe que lle adicamos no seu día. Unha experiencia completiña, completiña.

FELIZ DÍA DE ROSALÍA!

 Haberá moitas sorpresas ao longo do día... xa arrecende o Caldo de Gloria do que gozaremos no recreo... pero, como aperitivo, alá vai un recitado para abrir boca, a cargo do alumnado de 1º FPB e con música interpretada no piano da biblio.

Tentaremos dar cumprida conta ao longo da semana das actividades que vaiamos realizando. Feliz semana!

Bibliopoleiro · A xustiza pola man

Día das Escritoras

 Hoxe é o Día das Escritoras. Por suposto, todos os días o son, pero hoxe un pouquiño máis. Iremos partillando as lecturas compartidas de textos con Voces de Muller que fixemos nalgunhas aulas: sempre é bo momento para a lectura compartida e para poñer no seu sitio á metade da humanidade silenciada. Estiveron con nós as letras de Chus Pato, Rosalía de Castro, Emilia Pardo Bazán, Gloria Fuertes, Leonor de Aquitania, Alfonsina Storni... e moitas máis!

Feliz día!

Na frente unha estrela...

Como sempre dicimos, todos os días son o día de Rosalía... Pero hoxe, máis!

Aquí podedes ver tódalas entradas do blog nas que a mencionamos dalgunha maneira, e lembrade que o noso catálogo rosaliano da biblio e ben completo. Feliz día e boa fin de semana!

Oitava entrega... hoxe "En nome propio"

Hoxe, Sor Juana Inés de la Cruz, Violeta Parra, a nosa Rosalía de Castro, e outras!!!

Pica na imaxe para velas a todas!

Banda Sonora Letras Galegas 2020: Homenaxe a Negra Sombra

Hoxe deixámosvos coa a achega do Departamento de Música ás celebracións (virtuais) do Día das Letras.

Propoñémosvos como banda sonora das vosas lecturas desta semana estas homenaxes a Negra Sombra compostas polo alumnado de Linguaxe e Práctica Musical (1º bacharelato): sobre a base harmónica da musicalización de Xoán Montes do poema de Rosalía, o alumnado elaborou os seus propios arranxos, instrumentacións e novas melodías co editor de partituras Musescore. Que aproveite!!!