Seguimos coa celebración do día do libro

           A estas bibliotecarias non lles gustan os Días de Usar e Esquecer, como o Día da Muller, o Día da Paz, o Día do Libro…porque se resisten a celebrar un só día no ano o regalo inmenso que nos facemos cada vez que abrimos un libro e entramos na cabeza e na alma de quen o escribiu. É un xesto xeneroso, como abrir unha porta e convidar a entrar na nosa casa a quen chega. Haino que facer continuamente.

            Nos próximos días irémosvos ofrecendo, por entregas, unha antoloxía poética que titulamos “Con nome propio e… en nome propio” . Trátase dunha manchea de poemas onde os nomes das mulleres escoan dos versos de grandes poetas de todos os tempos, en galego e en castelán .(Ben está que os creadores homenaxeen as súas musas! Que menos! ); pero tamén vos achegaremos moitos outros textos nos que os nomes das mulleres se sitúan ao pé dos poemas, falando en distintas linguas, pero en nome propio, filtrando o mundo ao seu propio xeito.

Alá vai a primeira entrega!