Hoxe, libros e deporte en Celanova!

 Hoxe temos no IES a Juan Luis Fernández Pérez. Fará unhas sesións para o noso alumnado de futebol gaélico e pola tarde presentará o seu libro na Casa dos Poetas. Así que o luns xa teremos na nosa biblio un exemplar para que poidades aprender máis sobre este deporte.

Un móbil que foi o primeiro de moitas de nós...

 Sen tempo non foi: presentámosvos a nosa peza do mes de outubro. Desta vez tócalle a un aparato moi característico co que moitos nos iniciamos no mundo da telefonía móbil: un Ericson T10s. 

Aquí vos deixamos o material informativo: moi pronto, as imaxes da vitrina.

Premede na imaxe para acceder a toda a información!

Por fin instalada a exposición "Presas e Mestras"

 Xa podedes visitar nos noso corredor a xenial exposición que vos anunciamos fai uns días. De novo grazas ao Comité de Memoria Histórica da Comarca de Celanova por esta oportunidade!

En breve informaremos das actividades de dinamización que se organizarán. Quedade atentas!

Presas e mestras: a represión sobre as mulleres na comarca de Celanova

 

Atención! Boas novas! Mañá será instalada nos nosos corredores a exposición "Presas e mestras: a represión sobre as mulleres na comarca de Celanova", comisariada por Rosa Cid Galante e da man do Comité de Memoria Histórica da Comarca de Celanova: millóns de grazas por esta oportunidade!

Achegamos texto explicativo aportado polo Comité:

Que é a exposición

"Presas e Mestras" é un proxecto de investigación e divulgación impulsado polo Comité de Memoria Histórica da Comarca de Celanova, comisariado pola historiadora Rosa Cid Galante, con deseño gráfico e maquetación de Adriana Pérez e fotografía de Humberto Vergara. A mostra recupera e fai públicos os nomes e as historias de mulleres represaliadas na comarca durante a guerra e o franquismo, a través de dous fíos documentais complementarios: por unha banda, o dun cento largo de mestras sometidas a expedientes de depuración polo réxime franquista; por outra, o de máis dun centenar de presas que sufriron reclusión na cadea de mulleres de Celanova entre 1936 e 1938, así como no cárcere de partido durante os anos cincuenta. O obxectivo é dobre: reparar simbolicamente a memoria destas mulleres, ata agora practicamente descoñecidas, e poñer a disposición da cidadanía un relato histórico rigoroso, construído a partir de arquivos institucionais, fondos familiares e testemuñas orais.

Como se preparou e se difundiu

O proxecto contou cunha fase de difusión previa coidada, combinando a web e as redes sociais do Comité con accións de contido: adiantos textuais, gráficos e audiovisuais sobre a mostra. O marco de lanzamento foron as III Xornadas Memoria e Muller (27 e 28 de xuño), que renderon homenaxe a María Cabaco, fundadora e exvicepresidenta do Comité, e incluíron ponencias de referentes como Domingo Rodríguez Teijeiro, Lola Varela, Tamara López Fernández, Eliseo Fernández e Dionisio Pereira. A repercusión mediática foi notable, con cobertura en prensa dixital e radio de ámbito comarcal, provincial e autonómico, o que amosa a capacidade do proxecto para xerar interese máis alá do propio municipio.

A inauguración

A exposición abriu as súas portas o 28 de xuño no Auditorio Municipal Ilduara de Celanova (AMIC), cun acto que contou co apadriñamento da historiadora Aurora Marco e coa presenza institucional do Subdelegado do Goberno en Ourense, Eladio Santos, e do alcalde de Celanova, Antonio Puga. Non foi casual a data: coincidiu co 90 aniversario da votación do Estatuto de Autonomía de Galicia de 1936, dotando o acto dun forte valor simbólico. Despois pemaneceu dúas semanas en Ramirás, con visitas diarias; case tres semanas en Verea, onde o acto principal se celebrou o sábado 29 de agosto, e os últimos dez días de setembro en Gomesende. Cómpre destacar o apoio das alcaldesas e alcaldes destes concellos e a colaboración iniciada en todos os casos para actividades de recuperación da memoria histórica local.

Un proxecto sólido e replicable

Os créditos da exposición reflicten un traballo serio e ben sustentado: fondos documentais de familias da comarca e de institucións como o Arquivo Histórico Provincial de Ourense ou o Arquivo Xeral da Administración; colaboración xa formalizada cos concellos de Celanova, Ramirás, Verea e Gomesende; e un financiamento público claro, a través da subvención do Ministerio de Política Territorial e Memoria Democrática (Secretaría de Estado de Memoria Democrática), expediente 0164-AV-2025, por importe de 4.850 €.

Na páxina web do Comité: www.memoriacelanova.fala.gal dedicamos un apartado (https://memoriacelanova.fala.gal/exposicion-presasmestras/) ás novas e documentos que vai xerando o percorrido da exposición.

Hora de Ler!!!! Estreando cousas bonitas!

 A próxima semana veredes nas vosas aulas estes cartaces cheos de cores para que non se vos esqueza que estreamos un tempo de lectura diario que ogallá se convirta nun hábito que nos acompañe na nosa vida. Seguiremos informando!

Luís Conde, amor por Celanova

 Este curso non comeza como os demais no IES Celanova. Porque cando un piar importante da comunidade xa non está, todo cambalea. Fáltanos Luís Conde.

As imaxes non sempre mostran todo o seu significado. Aparentemente son uns simples lapis, pero a realidade é moito máis fermosa. Son uns lapis cargados de historia, de poesía, pero sobre todo de moito amor por Celanova. E esta foi a marabillosa idea de Luís colaborando coa biblio. Non pensabamos que podería ser a última. Con eles seguiremos escribindo a nosa historia, porque Celanova sempre será pedra, música e poesía pero tamén será a vila que non te esqueza nunca.

Peza do Verán: Exposición de cámaras

 Aí queda na vitrina a exposición para o verán... Porque no verán sacamos aínda máis fotos que o resto do ano, e gravamos máis vídeos.

Así que directas da nosa sección Arqueoloxía Audiovisual do museo, aquí volas deixamos, aínda que as fotos non fan xustiza... Pasade a velas!

Aquí, toda a información!