Utilidades ALFIN

 Para inaugurar decembro, traemos de volta esta compilación de recursos ALFIN que xa partillaramos fai un tempiño, ou estaban dispersos pola bitácora adiante. Agardamos que vos sexan de utilidade!

Emoción: A Tabula de Castromao, no noso salón

Só palabras de agradecemento ao Museo Arqueolóxico Provincial de Ourense por esta oportunidade.

Coa Tabula presidindo o salón, o alumnado de 1º ESO explicando marabillosamente a peza, a música de Javier Gándara e Santiago Comesaña e con algunhas visitas externas moi agarimosas pasamos un ratiño para non esquecer.

Deixamos unhas imaxes e un fermoso tríptico imprimible con información que ilustrou a explicación da peza, elaborado pola profesora de historia Noelia Domínguez.

 

O mércores, presentación da Tabula de Castromao

 

O noso paso pola Xornada de Bibliotecas Escolares

 Unha boa oportunidade para coñecer proxectos doutros centros e afondar en coñecementos diversos arredor das bibliotecas e a súa organización.

Velaquí o programa, no que aparecemos, pois fomos convocados para contar a nosa experiencia na campaña en curso, O Fogar das Musas. 

E aquí, o testemuño de que o noso nome proxectouse na enorme pantalla do Salón do Pazo de Congresos e Exposicións de San Lázaro, en Compostela.

Achados fabulosos: máis sobre a nosa campá

Mirade que sorte tivemos: na visita do xoves día 6, un dos asistentes comentounos que tiña constancia dunha imaxe dos anos 60 na que aparecía a campá colgada na súa espadana...

A nosa sorte continuou porque Hixinio non se esqueceu da conversa e nos achegou, procedente do Arquivo de Galicia, unhas imaxes da colección fotográfica de Chamoso Lamas onde se pode apreciar a campá na súa ubicación orixinal. Deixámosvos neste enlace máis fotos do mosteiro da mesma colección.

Millóns de grazas, Hixinio!

Unha visita á biblioteca... da man do alumnado de Oratoria de 3ºESO

 Como sabedes, o alumnado de oratoria está realizando a actividade "Guía por un Día", coa que estamos pasando moi bos momentos.

Quedou pendente na última entrada desta bitácora achegarvos este xenial material didáctico: con esta fermosa presentación, Fabio presentou a biblioteca, prestando os seus compañeiros a voz das locucións gravadas.

Premede na imaxe para enlazar co material interactivo. É unha marabilla, que aproveite!

As nosas visitas guiadas, un éxito!

 O mércores pola tarde e hoxe venres tivemos as dúas primeiras sesións de Guía por un Día, as nosas visitas guiadas da man do alumnado de oratoria de 3º, que está participando neste proxecto con moitísima ilusión.

O mércores encargáronse da visita Saray, Alba, Brais e Hugo. Algunhas familias, as nosas guías do Concello e reencontro con amigos... E ate dous cativos! Rematamos coa celebración do cumple de Brais.

O venres a visita fixérona Darleky, Ariadna, Nathalia y Fabio. Neste caso a visita foi inclusiva, cunha explicación audiovisual da biblioteca a cargo de Fabio, a quen os seus compañeiros e compañeiras prestaron a súa voz nas locucións gravadas.

ATENCIÓN, EDITAMOS: Aquí a presentación audiovisual inclusiva.